" كوبرا عمل قلبان " ، كان دايما عندي فضول كبير اني اشوف

 " كوبرا عمل قلبان " ، كان دايما عندي فضول كبير اني اشوف

محمد امام هيقدم ايه في الدراما بعد النجاح الرهيب اللي حققه في مسلسل النمر من 3 سنين و المسلسل ده كان مكسر الدنيا و نجح نجاح كبير اوي وقتها ، و طبعا محمد امام كان مشغول الفترة اللي فاتت في السينما و عمل فيلمين كسر الدنيا بيهم عمهم و أبو نسب ، إلا إني كنت مستني اشوف مسلسل جديد لمحمد امام و هل هيقدر يعمل حاجة تعلي على النمر و هوجان .

بتدور أحداث المسلسل عن علي صالح المحلاوي ( محمد امام ) المعروف باسم كوبرا و اللي بيخرج من السجن و قرر إنه يبدأ حياته من جديد و يبعد عن الإجرام إلا إن بيتم تكليفه من المعلم شيخون ( مجدي كامل )  بعملية سرقة بنك و بيتم توريط كوبرا بجريمة قتل أثناء السرقة ، و من هنا بتتوالى الأحداث . 

أقدر أقول و بقلب جامد إن مسلسل كوبرا يعتبر عودة موفقة لمحمد امام ، و دايما محمد امام من النجوم اللي بيكون عندي ثقة كبيرة جدا في كل عمل بيقدمه سواء سينما أو دراما و بيعجبني في محمد امام أنه حريص طول الوقت أنه يقدم حاجة حلوة و مختلفة و أنه يطور من نفسه طول الوقت ، علشان كدة انا بكون حريص اني استنى أعماله من السنة للسنة ، المسلسل  ممكن تكون القصة بتاعته مش جديدة بس أنا شايف إن المسلسل اتنفذ كويس جدا و بشكل لذيذ و مسلي ، مشاهد الأكشن في المسلسل عجبتني جدا ، الجانب الكوميدي هو أحلى ما في المسلسل بجد المسلسل ده الكوميديا فيه كانت موفقة بشكل كبير جدا ، إيقاع المسلسل كان متصاعد مع كل حلقة ، الأداء التمثيلي في المجمل كان كويس ، انا عندي بعض التحفظات على المسلسل أول حاجة الجرافيكس في المسلسل حسيتها مش أفضل حاجة و ده بان جدا في المشهد بتاع لما محمد امام حرق العربية اللي سرقوا بيها البنك ، تاني حاجة بصراحة الدور بتاع أحمد فتحي محبيتوش خالص ، تالت حاجة في الحلقة الأخيرة المفروض كان فيه مشهد كان محمد امام في المحكمة و خلاص بيركب عربية الترحيلات علشان يروح السجن فجأة المشهد اللي بعديه لقينا محمد امام خرج من السجن بعد شهر ف حسيت أن كان محتاج يبقى فيه توضيح إذا كان خرج ولا هرب . 

الأداء التمثيلي . 

محمد امام : في رأيي محمد امام عمل دور كويس جدا و حبيت جدا مشاهده مع كزبرة مشاهدهم كانت حلوة و لذيذة اوي و بجد كان فيه كيميا لطيفة اوي بينهم ، و كمان حبيت جدا مشاهد محمد امام مع محمد ثروت و محسن منصور بجد كانت من أحلى مشاهد المسلسل ، و اكتر مشهد حلو جدا جدا لمحمد امام و عمله حلو اوي في الحلقة ال 14 لما زار قبر والدته بجد كان مشهد صعب جدا و محمد امام عمله حلو اوي ، بجد محمد امام كل مدى فعلا حريص أنه بيطور نفسه و فعلا هو فنان مجتهد جدا و بيشتغل على نفسه كويس اوي . 

محمود عبد المغني : عمل الدور حلو اوي و كان إضافة مهمة جدا جدا للمسلسل و مشاهده مع محمد امام كانت قوية و في رأيي هو قدم دور الظابط بشكل واقعي و مختلف  .

مجدي كامل : بجد عودة قوية جدا لمجدي كامل حقيقي فنان قدير و ممثل من العيار التقيل و وجوده عمل إضافة كبيرة و قوية جدا للمسلسل و بجد وجوده عامل تقل للمسلسل و بجد انا مبسوط أن مجدي كامل اتحط في دور مبين إمكانياته و لو أن مجدي كامل إمكانياته أعلى من كدة بكتير و لسه عنده كتير اوي .  

كزبرة : بجد ده بقى أحلى حاجة في المسلسل عامل الدور حلو اوي اوي و بتلقائية و مشاهده مع محمد امام لذيذة اوي و بتضحك جدا . 

أحمد عبد الحميد ( حربي ) : عمل الدور حلو اوي و الدور جديد و مختلف عليه و هو قدر يثبت شطارته من خلال الدور ده و هو قدر يلفت نظري جدا طول المسلسل . 

أحمد فتحي : بصراحة محبيتش دوره خالص . 

دنيا ماهر : عملت الدور حلو اوي و أداءها كان رائع جدا .

صفاء الطوخي : وجودها كان إضافة مهمة جدا للمسلسل . 

ألحان المهدي ( منال ) : عملت دور حلو اوي . 

منة فضالي : وجودها كان لطيف جدا في المسلسل و عملت مشاهد حلوة مع محمد امام . 

هشام اسماعيل : عمل دور حلو اوي و من أحلى أدوار هشام اسماعيل على مدار الفترة الأخيرة . 

محمود البزاوي : عمل دور جامد جدا و وجوده عمل تقل للمسلسل . 

علاء مرسي : عمل الدور حلو اوي و مشاهده مع محمد امام كانت لذيذة  . 

محمد ثروت : دوره كان حلو جدا و حبيت جدا مشاهده مع محمد امام و من اكتر الأدوار لمحمد ثروت اللي ضحكتني جدا . 

محسن منصور : كان إضافة لذيذة جدا للمسلسل و من اكتر اللي ضحكتني جدا في المسلسل و عمل مشاهد حلوة اوي مع محمد امام . 

مريم الجندي : دورها كان حلو اوي و مشاهدها مع محمد امام كانت لذيذة و بتضحك جدا . 

هالة فاخر : عملت دور حلو اوي بالرغم أن مساحة الدور مش كبيرة.  

أحمد بدير : عمل دور رائع جدا و ساب بصمة جميلة في المسلسل . 

أوس أوس : مشاهده كانت ملهاش حل بجد و كان فيه كيميا حلوة بينه و بين محمد امام . 

تقييمي للمسلسل ككل 7,5/10 ❤️❤️❤️❤️.  

Mohamed Emam - محمد إمام 

Mahmoud abd elmoghny 

مجدي كامل - Magdy Kamel 

كزبرة - kozbara 

Mahmoud Albezzawy - محمود البزاوي 

Mohsen Mansour - محسن منصور 

Mohammed tharwat 

Menna Fadaly