ذكريات الطفولة كتبت/ نجوي جمال

 ذكريات الطفولة

كتبت/ نجوي جمال

 

فاكر شعور أول يوم مدرسة، فاكر كان ممكن ماتنمش ازاي من كتر الحماس.

أول رحلة مدرسة تطلعها مع صحابك، وازاي كنت بترتب اللبس اللي هتلبسه قبلها بأسبوع.

أول يوم مصيف والشارع اللي أخره البحر وريحة البحر وانت بتجري بشغف كأنك رايح تقابل حبيبك.

أول يوم جامعة و فكرة "لايلو لايلو لاي لاي" اللي كنت راسمها في دماغك.

طيب أول يوم شغل في الوظيفة اللي بتحلم بيها.

أول يوم تشوف فيه حب عمرك وتحس ان هو ده اللي عايز تكمل معاه وفجأة ننزل بأغنية "بيت كبير" للفنان القدير تامر عاشور في الخلفية.

احساس البدايات في كل حاجة هو أهم حاجة؛ هو اللي بيخلينا نحس بالسعادة اللي قادرين نكمل بسببها.

هرمون السيروتونين أو ما يعرف "بهرمون السعادة" علي رأي الفنان القدير الثاني تامر حسني جسمنا بيحتاجه من وقت للتاني عشان نقدر نكمل في الدنيا دي، مش لازم بس نحس بيه فترة البدايات.

هل تعلم عزيزي القارئ أن نقص هرمون السيروتونين يمكن أن يكون له دور في الإصابة بالإكتئاب ويؤثر بشكل كبير علي الصحة العقلية "اه والله زي ما بقولك كده"

مهم من وقت للتاني تخرج خروجه حلوة، أدخل سينما مع صحاب المدرسة والجامعة، جمع العيلة واسهروا مع بعض، ألعب رياضة بتحبها وابذل مجهود يخرج الطاقة السلبية وأصحابها، اطلع في الشمس وشم هواء نظيف وافصل من كل شئ، كل أكلة حلوة مع حد بتحبه.

عارفة ان الوضع المادي بقي صعب ويجيب اكتئاب لوحده، الله يكون بالعون.

بس و بعدين "هيكون مافيش فلوس و كمان مرضي"

بجد لازم الواحد من وقت للتاني يفصل بأي شكل وافتكر ان جسمك وصحتك النفسية ليهم حق عليك وحلاوة البدايات بإيدك تخليها معاك العمر كله.